Амаль у кожнай краіне сталіца жыве лепш, чым рэгіёны. Але Беларусь вылучаецца тым, што сённяшні эканамічны крызіс ставіць пытанне, ці іншыя гарады наагул здольныя змагацца са сталіцай за працоўныя кадры. Пакуль што паказчыкі рэгіёнаў выглядаюць слаба.

Усё больш і больш раёнаў літаральна выміраюць. Міністэрства эканомікі прагназуе, што да 2032-ага 77 раёнаў (то бок большасць з іх) не будуць мець устойлівай колькасці жыхароў (15-20 тысяч чалавек). У 2013-ым лічба такіх раёнаў складала 51, што таксама не мала.

Пры гэтым, што жыхары рэгіёнаў у прынцыпе жывуць менш, чым у сталіцы. Чаканая працягласць жыцця ў Мінску 75,5 гадоў, а за кальцавой у сярэднім на пару гадоў менш.

Беларускія рэгіёны адыгрываюць усе меншую ролю ў беларускай эканоміцы. Іх доля ў валавым унутраным прадукце змяншаецца і яны патрабуюць усё больш грошаў для ўласнага выжывання. У 2015-ым чвэрць раёнаў запаўняла ўласны бюджэт менш, чым на 40%.

Паводле Нацбанку і Мінэканомікі яшчэ чатыры гады таму траціну беларускіх раёнаў можна было лічыць дэпрэсіўнымі. Цяпер гэтая лічба, напэўна, павялічылася.

Падзенне рэальных заробкаў у сталіцы меншае, бо вялікія гарады з больш прасунутай і дыверсіфікаванай эканомікай лепш адаптоўваюцца да крызісаў. Сёння жыхары сталіцы зарабляюць у паўтары разы больш, чым іншыя беларусы, і разрыў будзе толькі павялічвацца. Гэта будзе вымушаць яшчэ болей людзей пераязджаць з рэгіёнаў у сталіцу.